الشعب المنسوخ(copy)

يسلمو عالموضوع الحلو
بس بحب شارك بأنو أخد الشكل الغربي بيكون سيء بس وقت ما بيكون في مضمون أما إذا الواحد أخد الشكل الغربي و حافظ عمضمونو و قيمو فما بتصور أنو الأمر رح يكون بهالسوء اللي حكا عنو أشرف ....
و شكرا مرة تانية

بالعكس بتول نحنا بدنا من الشباب يقولو رأين بصراحة بالمنتدى وهالشي كتير بهمنا لأنو عم نشتغل منشان الشباب وشكرا كتير ع الإهتمام
بس في ملاحظة صغيرة أنو أنا قلت أغلبية الشباب مو كلن بيسمعو ومابيفهمو الميتال والروك لأنو في أغاني ميتال بغض النظر عن الموسيقى صاخبة جدا عنجد كلماتا حلوة ومعبرة وفيا معنى وعفكرة أنا كمان بسمع أغاني أجنبية بس بفهم يلي عم أسمعو مومتل معظم الشباب يلي بيسمعو أجنبي منشان يكملو الستايل مع العلم أنو يمكن تتضمن هالأغاني كلمات بلا معنى وسيئة وصف حكي بس وهالشي من الواقع يلي عايشينو
و شكرا كتير ع مشاركتك الحلوة Wink

شكرا الك كتير الك يا امل ع هالموضوع المهم بس في تعليق صغير انو مو كل يلي بيسمعو روك و هيك شغلات بيكون مشان يكونو كوووول او شي بس لانو يمكن هيك زوقهن و مو الكل ما بيفهمو يلي بيسمعو يعني انا كتير بحب اسمع الاغاني الاجنبية لانو بفهم يلي عم بسمعو و يلي بيفهم هالاغاني رح يشوف انو كتييييييير فيها معاني حلوة و رائعة بس انا معك بكلشي تاني حكيتيه و عنجد لازم نشتغل لحتى نخلي الغرب هنن يلي يقتدوا فينا لانو نحنا ما بينقصنا شي عنهن لحتى يكونو احسن مننا ولازم نكون واثقين بانفسنا اكتر من هيك و مانكون سطحيين و نلحق الصيحات الاجنبية و الشغلات الفاضية تبعن و بتشكرك مرة تانية ع الموضوع الحلو
بس في شغلة تانية كمان بتمنى انو المشرفين كل يوم يزورو المنتدى و يشوفو شو في جديد و يردوا عليه لانو انا بشارك بموضوع و بتطولوا لتردوا عليه ما تزعلوا مني بس انا عم بحكي مشان المنتدى و مشان تشجعونا نزوروا و نشارك فيه اكتر من هيك و اسفة ازا طولت عليكن بس حبيت احكي هالكام شغلة يلي بتمنى تاخدوها بعين الاعتبار وشكرا الكن مقدما

~~حكي فاضي~~ قصدي انو هلي عما بيعملو الشباب كلو حكي فاضي
موضوع قيم شكرا كتير

فعلا هيك مواضيع هي يلي لازم ينتبه عليا شباب هالأيام حاجة مخدوعين بالمظاهر ع شي فاضي ويطوروا حالن باتجاهات ايجابية إلن أكتر
يسلمو يا أمولة عهل الموضوع الحلو cat

موضوع كتير حلو .... فعلا نحن محتاجين هيك نظرة !
و بكلامك عن هالأنماط ك copy في كتير مجاملة ... لأنو الأشخاص هدول أغبى بكتير من أنو يكونو نسخة عن الغرب
لأنو هنن أخدو القيم المحلية السيئة و غلفوها بقشرة غربية أسوأ ليخدعو الأغبياء أمثالن بنمط جديد أو ستايل جديد أو موبايل جديد أو طريقة حكي جديدة بتعبر عن محتواهن الفارغ... ... مرة تانية شكرا عهالموضوع

موضوع حلو كتير _ لان لازم الشباب يفهموا انو مو كلشي غربي هو الافضل و الاكتر كمالية .. و لازم يقتنعوا بحالن و انو انا انا و مافي داعي غير بحالي بس مشان كون عصري و مودرن ستايل يعني ع اساس شي كتير بيلفت النظر ... و اذا كان الواحد انو خلاص ناوي يغير ..يغير بس يضل على اخلاقو و تقاليدو لان لازم يتذكر انو عربي..سوري مانو باميركا او باوربا.
"مشكورة كتير أمل على الموضوع"
Cool

الشعب المنسوخ(copy):
رح أحكي اليوم عن موضوع كلنا ساهمنا بوجودو قصداً أو عن غير قصد ،وكلنا جزء منو حتى لو كنا ما بدنا ،لأنو حتى الهوا اللي عم نتنفسو جايي من مغرب ( من الغرب ) .
بصراحة نحنا شعب متخلف حتى لو حاولنا نتقدم لأنو لما منجي لنستفيد (و نسرق ) اللي عملو الشعوب التانية مننسخوا نسخ من دون ما نعدل فيه و نطورو لذلك نحنا نسخة احتياطية من بين شعوب العالم ( copy) .
وعكل حال نحنا منقلد الغرب بكل ما هو سطحي وتافه ويلي بينحصر باللبس والستايل والحركات يلي بتخالف معتقداتنا وتقاليدنا (يعني التقليد بينحصر بالقشور يلي مإ إلا نفع ومنترك اللب) فالشباب بالغرب عندن إيجابيات متل تقديسن للوقت والعمل والتفريق بين الجد والمرح وبيستخدمو عقلن بشكل إيجابي وأهم شي أنو تفكيرن ما بينحصر بأشياء سطحية متل الروك يلي منسمي بالوقت الحالي بالموضة العصرية فنحنا منضل مبهورين بأي شي غربي أو حتى بالإعلام الغربي لأنو الصورة يلي نحنا عم نشوفا هي نقطة من بحر الواقع والحياة الغربية.(( هناك بعض الإيجابيات في المجتمع الغربي , فلديه التنظيم والقدرة على مواجهة عيوبهم وأخطائهم , بينما نحن في المجتمعات العربية نخاف أن نواجه عيوبنا وأخطاؤنا وكأننا مجتمع فاضل بلا عيوب))
و الفضائيات دائما حريصة أنو تفرجينا الأشياء اللي بتخلينا نتخلف و نرجع شي 1000سنة لورا ( التحرر الزائد /الانفلات و المياعة /) و بتخبي الصفات الايجابية عند الشباب الغربي ( حب العلم و التطور و العمل و العمل التطوعي) حتى على صعيد الذوق الفني صرنا منعتبر أنو اللي بيسمع أم كلثوم وفيروز وعبد الحليم....... هو أنسان رومانسي و تافه ، بينما إذا كان بيسمع روك و ميتال ( طبعا على الأغلب من دون ما يفهم و لا كلمة منا ) هو انسان متحضر و فهمان و كوووووول .
وبالمقابل ما فينا نقول أنو الغرب هو اللي فرض علينا نكون هيك ، لأ بالعكس نحنا بإرادتنا صرنا هيك لأنو هيك منفهم التقدم و الانفتاح .
فيا شباب خلونا نكون قدوة للأجيال اللي رح تجي من بعدنا و ننبدا نحط صورة جديدة للشباب العربي.ونسأل حالنا ليش مابتكون إلنا شخصية مستقلة؟ ليش ما منخلي الغرب هني يلي يقلدونا ؟ليش ما منواجه عيوبنا وأخطائنا ومنصلحا ومنفكر بعمق أكتر من هيك؟ وكل واحد فينا بيصنع شخصيتو. ((ومع الوعي أكيد رح نتقدم للأحسن)).
}إذا حبيتو الموضوع أو ما حبيتو حطو المؤشر على QUOTEو كتبو رأيكن بصراحة{

**أمل الخطيب__ 22 \02 \2011**